ڪتاب ”ڳالهه پِريان جي ڳُجهه جي“ - رکيل مورائي (Rakhyal Morai)

ڪتاب ”ڳالهه پِريان جي ڳُجهه جي“

رکيل مورائي

سنڌي، اردو توڙي انگريزيءَ ۾، سنڌي ٻوليءَ جي عظيم شاعر شاهه عبداللطيف ڀٽائي بابت مسلسل لکيو ويو آهي ۽ لکجي رهيو آهي. ظاهر آهي ته انهن سڀني لکندڙن جو شاهه سائينءَ سان لکندڙ جي حيثيت ۾ هڪ لاڳاپو آهي، پر هڪ شخص جنهن جو ڀٽائيءَ سان لاڳاپو هڪ ليکڪ طور ته آهي ئي، پر فنا جي حد تائين هُن جو ڀٽائيءَ سان عشق به آهي ته اهو ليکڪ/شخص آهي، اسان جو دوست سليم ڀٽو، جيڪو نه رڳو پنهنجي نالي سان لطيفي لکندو آهي پر هڪ ليکڪ طور هن پاڻ ڀٽائيءَ کي ارپي ڇڏيو آهي، ان معنيٰ ۾ ته هو ڀٽائيءَ تي لکڻ کان سواءِ باقي لکڻ گناهه سمجهي ٿو. ممڪن آهي ته مان ائين سمجهندو هجان پر، منهنجي اکين آڏو سليم ڀٽي صاحب جا ڀڳ سڀ ڪتاب موجود آهن. اها ٻي ڳالهه آهي ته شاهه سائينءَ تي پنهنجي هڪ هٽي رکندڙ ڪي عالم هن کي پنهنجي ڀر ۾ بيهڻ نه ڏين، پر سچ پچ ”تنهن عشق کي شاباس، جنهن محبتي ميڙيا“ وانگر هن جو ڪم ۽ هن جو عشق، سدائين سلامت رهي. منهنجي اهڙي خواهش آهي.

سليم ڀٽي لطيفيءَ جي ان عشق جو تازو مثال هيءُ ڪتاب آهي، جنهن جو نالو آهي ”ڳالهه پريان جي ڳجهه جي“ جيڪو پڻ شاهه سائينءَ جي حوالي سان ئي آهي. شاهه سائين بابت ۽ ان جي الڳ الڳ پهلوئن بابت لکيل هن ڪتاب جا سڀ ليک شاهه سائينءَ جي بيتن جي هڪ هڪ پد تان کنيل آهن. جيڪي شاهه سائين جي فن جي وضاحت ڪن ٿا.

سليم صاحب هڪ درجن کن ڪتاب سنڌي ٻوليءَ ۾ شاهه سائين جي شخصيت ۽ فن توڙي فڪر جي حوالي ۾ لکيا آهن، جيڪو وڏو ڪم آهي. هي ڪتاب پڻ شاهه سائين جي شعر کي سمجهڻ ۾ هڪ مددگار ڪتاب آهي، جيڪو پڙهندڙ لاءِ لطيفيات جي حوالي ۾ هڪ اهم ڪڙي ثابت ٿيندو. ليکڪ جي عشق جي سلامتيءَ جو مثال آڻيندڙ هي ڪتاب ”لطيفي تحقيقي تڪيو“ نالي اداري شايع ڪيو آهي ۽ ان کي خوبصورت ڇپيو آهي، سنڌيڪا اڪيڊمي ڪراچيءَ. شاهه سائينءَ بابت ڇپيل هن پڪي خوبصورت جلد واري ۽ 198 صفحن تي پکڙيل ڪتاب جو ملهه 250 رپيا آهي.