مخدوم جعفر بوبڪائي - رکيل مورائي (Rakhyal Morai)

سنڌي ادبي بورڊ جو نئون ڪتاب

مخدوم جعفر بوبڪائي

سوانح حيات، علمي ۽ ادبي خدمات

رکيل مورائي

سنڌي ادبي بورڊ جو تازو ڇپيل هيءُ ڪتاب انهن ڪتابن ۾ شامل آهي، جيڪي سنڌ جي آڳاٽن مشاهيرن بابت آهن، جن سنڌ کي علم ادب، تصوف ۽ ٻين ڪيترن ئي حوالن ۾ شاهوڪار بڻايو. مخدوم جعفر بوبڪائي پڻ انهن ۾ شامل آهي، جنهن علم، ادب، تاريخ، منظق ۽ فقهه بابت ڪيترو ذخيرو سنڌ کي ڏنو. ڏک جهڙي ڳالهه اها آهي ته، هنن عالمن ۽ عقيدت ڀرين شخصيتن  بابت بنهه گهٽ لکيو ويو آهي.

ڊاڪٽر مولانا عبدالله کوسي صاحب، سنڌ جي هن عالم ۽ محقق تي هڪ وڏو عرصو تحقيق ڪري هڪ املهه ڪتاب لکيو آهي، جنهن ۾ مخدوم جعفر بوبڪائيءَ بابت ممڪن حد تائين معلومات ملي ٿي، مخدوم صاحب جي سوانح، سندس علمي، ادبي، تاريخي ۽ مذهبي خدمتون نهايت تفصيل سان هن ڪتاب ۾ ترتيب سان ڏنل آهي. هن قسم جا ڪتاب هڪ اعزازي ڊگري جيترو مرتبو رکن ٿا. مخدوم جعفر بوبڪائي تي هيءُ ڪتاب ڊاڪٽر صاحب جنهن ترتيب ۽ محنت سان لکيو آهي، ان جي ساراهه ئي ڪرڻ گهرجي، ڇاڪاڻ ته هيءُ ڪتاب ڪاراسائيمنٽ نه آهي، هيءَ پيار جو  پورهيو آهي يا عقيدت جو اظهار آهي، جنهن کي سِڪن ۾ توري نه سگهبو.

هيءُ ضخيم ڪتاب چئن حصن ۾ آهي، جن کي الڳ الڳ بابن ۾ ورهايو ويو آهي، جن ۾ مخدوم صاحب جي زندگي، خاندان، بوبڪ، سنڌ ۽ علائقي جي تاريخ سان گڏ مخدوم صاحب جو اهو سمورو ڪم ڏنو ويو آهي، جيڪو اڃا تائين سنڌي پڙهندڙن کان اڃا اوجهل آهي ۽ بورڊ جو ئي ڪم آهي ته اهو سمورو علمي، ادبي، تاريخي ۽ مذهبي ذخيرو ائين روشنيءَ ۾ آڻي، جيئن هيءُ ڪتاب ان آندو آهي. ڊاڪٽر عبدالله کوسي صاحب جو هيءُ پيار جو پورهيو يقينن سنڌ جي علم دوست ماڻهن ۾ مان ماڻيندو، ۽ سندس پورهئي کي محبت سان ڏٺو ويندو. هيءُ ڪتاب هڪ تحقيقي ڪتاب آهي، جيڪو تحقيق جي حوالي ۾ گهڻو گهڻو ڪم ڏيندو ڇاڪاڻ ته هيءُ بنيادي ڪتاب ڪري ليکيو ويندو مخدوم جعفر بوبڪائي جي خدمتن بابت. 668 صحفن جو هيءُ دستاويز پڪي جلد سان سٺي پني ۽ سٺي ٽائيٽل سان ڇپائي بورڊ جي عملدارن هڪ سٺي ڪتاب ڇپائڻ واري روايت کي برقرار رکيو آهي ان لاءِ جو جس لهڻن. هن ڪتاب جو ملهه 500 رپيا آهي.