سائين ذوالفقار قادريءَ جي آتم ڪٿا - رکيل مورائي

سائين ذوالفقار قادريءَ جي آتم ڪٿا

پلئه پايو سچ

رکيل مورائي

سياست، ادب، روحانيت، ذهانت، واڌو شهادتن، غدارين ۽ ٻين ڪيترن ئي حوالن سان ملڪ ۽ ملڪ کان ٻاهر پنهنجي سڃاڻپ رکندڙ سنڌ جو هڪ نهايت اهم شهر لاڙڪاڻو ۽ ان جي هڪ عقيدت ۽ احترام لائق فئملي، قادري فئملي جنهن تي لاڙڪاڻي کي وڌيڪ ئي فخر هجڻ جڳائي ۽ ائين سموري سنڌ کي فخر هجڻ جڳائي، جنهن قادري فئملي جو تعلق سنڌ جي سچ، سونهن، محبت ۽ بيباڪي جو سڏ ڏيندڙ سچل سرمست آهي، ۽ ان کان پوءِ ڄڻ اڻ ڳڻيا نالا، علم، ادب، سياست ۽ روحانيت ۾ پنهنجو خاص مقام رکندڙ آهن ۽ شايد اهي نالا هن ڪتاب لکندڙ، صوفي دل رکندڙ، دوستن سان پيار ڪندڙ ۽ چهري تي سدائين معصوم مرڪ آڻي دوستن سان ملندڙ ۽ ساڳئي وقت هن ملڪ جي نهايت اهم عهدن کي پنهنجي موجودگيءَ جو اعزاز بخشيندڙ سائين ذوالفقار علي قادريءَ کان پوءِ به هلندا ۽ هو ساڳئي طريقي سان علم ادب ۽ روحانيت ذريعي سنڌ کي پنهنجون محبتون آڇيندا رهندا اهڙي پڪ آهي ۽ اهڙي محبت ”پلئه پايو سچ“ نالي ڪتاب معرفت سائين ذوالفقار علي قادريءَ سنڌ کي ارپي آهي، جيڪا اڄ لکندڙ طور توڻي پڙهندڙ طور اسان سنڌين کي جوڙي ويٺي آهي.

قادري صاحب نه رڳو پنهنجي زندگيءَ جا تجربا هن ڪتاب ۾ لکي سنڌي نوجوانن جي رهنمائي ڪئي آهي، پر هن کان اڳ هن ”قادري قلم قبيلو“ نالي ادارو جوڙي پنهنجي سموري خاندان جون علمي، ادبي ۽ شعري، محبتون محفوظ ڪري ورتيون آهن، جن جو انگ ٻن درجنن کان مٿي ٿيندو، ۽ هاڻ جڏهن هن عهدن کي ڇڏي پنهنجو سمورو وقت لکڻ پڙهڻ کي ڏنو آهي‏، ته هن هڪ لاجواب آتم ڪهاڻي تي ٻڌل ڪتاب سنڌي ادب کي ڏنو آهيئ

واڌو اهو ته هن آتم ڪٿا جو ڦهلاءُ گهڻو گهڻو وڌيو آهي، ڇاڪاڻ ته هيءَ آتم ڪٿا، سنڌيءَ سان گڏ، اردو توڻي انگريزيءَ ۾ به ڇپجي مارڪيٽ ۾ آئي آهي، ان ڪري هن آتم ڪٿا مان گهڻي کان گهڻا نوجوان فيض حاصل ڪري سگهن ٿا. هن ڪٿا ۾ قادري صاحب نه رڳو پنهنجي شخصي تجربن کي لکيو آهي، پر هن اها ڳالھه ذهن ۾ رکي آهي ته هو پنهنجي ايندڙ نسل کي ڪجھه ڏيئي رهيو آهي. هو ادارا جوڙيندڙ شخص به آهي ته انهن کي اڳتي وڌائيندڙ به آهي، ۽ اهو به قبول ڪيو ويو آهي ته، قادري صاحب جن به ادارن ۾ رهيو آهي، اهي گهڻو ئي مٿي اڀري آيا آهن. اهڙو رڪارڊ ڪجھه ادارن ۾ به موجود ۽ محفوظ آهي ۽ ڪجھه هن ڪتاب ”پلئه پايو سچ“ ۾ پڻ.

هن ڪتاب جي اهميت ان ڪري به گهڻي وڌيل آهي جو هيءُ ڪتاب شخصيت جي آس پاس کان وڌيڪ سماج جي آس پاس آهي، اسان جي ادارن جي آس پاس آهي، ۽ قادري صاحب پاڻ انهن جي وچ ۾ ويهي، هڪ رهبر جيان پڙهندڙ جي رهبري ڪندي نظر اچي ٿو. هيءُ ڪتاب، تعليمي نصاب ۾ شامل ڪرڻ جي به اهميت رکي ٿو. ان لاءِ جو هن ڪتاب ۾ هڪ ادارا جوڙيندڙ شخص جي زندگيءَ جا آزمودا آهن، جن مان اسان جو ايندڙ نسل گهڻو ئي پرائي سگهندو، اهڙي اميد ڪري سگهجي ٿي. تجربن، محبتن، محنتن، سچائيءَ ۽ سادگيءَ سان ڀريل هيءُ ڪتاب هڪ رهبر ۽ هڪ اڳواڻ ٿيڻ وارو آهي. جيڪڏهن ان کي دل جي حضور سان پڙهيو ويو ۽ پوءِ لاڙڪاڻي جي ان ڪنڊ کي عقيدت سان سلام ڪرڻو پوندو، جنهن کي ميان جي ڳڙهي چيو ويندو آهي، ۽ جتي هن سنڌ جي صدوري پٽ جنم ورتو آهي، جنهن نه رڳو ڳڙهي جي آبرو رکي آهي، لاڙڪاڻي جي آبرو رکي آهي، سنڌ جي آبرو رکي آهي، پر هن ملڪ جي آبرو پڻ رکي آهي. هن شخص جو احترام لائق نالو، ذوالفقار علي قادري آهي، جيڪو سڀني جو دوست ۽ سڀن کان وڌيڪ سنڌ جو دوست آهي ۽ هن جو انسان جي چڱائيءَ ۾ ويساھه آهي، جيڪو هر صوفيءَ کي هوندو آهي. هن املھه ڪتاب ۾ 240 صفحا آهن. سهڻي پني تي ڇپيل رنگين تصويرن ۽ پڪي جلد واري هن ڪتاب جو ملھه 300 رپيا آهي.