سنڌو لکت ايڪيهين صديءَ ۾ ٿيل نئين تحقيق (ڪتاب)
رکيل مورائي
هيءُ ڪتاب جيئن نالي مان ظاهر آهي، هڪ اهڙي تحقيق تي ٻڌل آهي جنهن کي
جديد/ نئين تحقيق چيو ٿو وڃي. هيءُ ڪتاب پڙهي، اهو به اندازو ٿئي ٿو ته سنڌو تهذيب
توڻي سنڌو لکت بابت کوجنا مسلسل جاري آهي. سنڌو تهذيب/ انڊس سولائيزيشن اهڙو موضوع
آهي، جنهن تي ننڍي کنڊ سميت جيڪا مختلف يورپي ملڪن ۾ تحقيق ٿي رهي آهي، اها يا ته اسان
تائين گهٽ پهچي ٿي يا اسان جا محقق ان طرف جوڳو ڌيان نٿا ڏين، جنهنڪري سنڌ ۾ اهڙو نئون
تحيقيق ڀريو ڪتاب نٿو ظاهر ٿئي.
هن ڪتاب ۾ توڻي جو الڳ الڳ مضمون آهن ۽ انهن جا ليکڪ پڻ الڳ الڳ ملڪن
سان واسطو رکن ٿا پر سندن موضوع سنڌو لکت آهي. ڀلي سندن ويچار الڳ آهن، جيڪي فطري به
آهن پر سنڌ کي هڪ نئين تحقيق تي ٻڌل ڪتاب مليو آهي، جيڪو ممڪن آهي، سنڌ ۾ ڪن نون رخن
کي ظاهر ڪري. ان ڪري هن ڪتاب جي اهميت تحقيقي حوالي ۾ گهڻو آهي ۽ خاص طور سنڌي ٻوليءَ
۾ ته هيءُ ڪتاب وڌيڪ اهم بڻجي ويو آهي. نئين صديءَ جي نئين تحقيق کي نه رڳو سهيڙيو
ميڊم فهميده حسين آهي پر سمورو ڪتاب ترجمو به هن ئي ڪيو آهي ته ان تي
هڪ جامع مقدمو پڻ هن ئي لکيو آهي.
سنڌو لکت جي ڄاڻ بابت هيءَ سنڌيءَ جي عالمن ۽ اديبن لاءِ هڪ اهميت وارو
ڪتاب آهي، جيڪو سنڌي ليگئيج اٿارٽيءَ پاران خوبصورت ٽائيٽل، سٺي پني تي پڪي جلد سان
ڇپيل آهي. ڪتاب ۾ 224 صفحا آهن ۽ ڪتاب جو ملھه 250 رپيا آهي.
هن ڪتاب جي اچڻ تي سرهائي ٿئي ٿي.
No comments:
Post a Comment